Act 23 | KYG | STEP | Polo'a he tino mai'neno'ae'mo kanisole vaya'mo aulu hapaeno apake'neno'ae'mo, Konaga'nimogitapae, huno, Goti aulagale'mo nehuva kavafe'mo yu'ilaga veka'nimo'a agoti huno no'nate, huno hapa pai'niye.

Acts 23

Polo'a kanisole vaya'ai apaulagale'mo he tino mai'niya gemae

1 Polo'a he tino mai'neno'ae'mo kanisole vaya'mo aulu hapaeno apake'neno'ae'mo, Konaga'nimogitapae, huno, Goti aulagale'mo nehuva kavafe'mo yu'ilaga veka'nimo'a agoti huno no'nate, huno hapa pai'niye. 2 Mono hu'a ne'apataya vaya'aite'mo yagaino ne'apateya vekamo agi'amo Ananayasi'a Polo haopale'mo he ti'a mai'naya vaya'aife'mo, Avayamo aitapa lagaiyo, huno hapa pai'niye. 3 Polo'a, Hosu ya'mo'a vaya apaulagale'mo alagepa yakana huno hanesiyafe'mo yaveyave aniteti'mo fale'a ati nekaya yakana huka mai'nane. Goti'a kamagigiye. Kagaemo ke'aepa geleti'mo agoti huka natesanafe'mo mai'nana'monanafa kagaemo ke'aepa gemo ago amagika ataleteka amagiyo, huka hu'nane, huno ha pai'niye. 4 Polo haopale'mo he ti'a mai'naya vaya'mogi hu'apae'mo, Gotife'mo mono hu'a ne'apataya vaya'aite'mo yagaino ne'apateya vekae'mo huka faipa huka ne'atapiye, hu'a afi ge'nae. 5 Polo'a ge'apile'mo aeno atagaina huno hapa paino'ae'mo, Konaga'nimogitapae, huno, Mono hu'a ne'apataya vaya'aite'mo yagaino ne'apateya vekamo mai'niye, hu'na nagaemo o'age'nove. Goti mukufati gemo'mo huno'ae'mo,Lapakae vaya'aite'mo yagaino ne'apateya vekae'mo hutapa faipa huta o'ateyo, huno hu'niye, huno hapa pai'niye. 6 Polo'a apakeyana Satiyusi vaya'e Falasi vaya'e'mo e'a mai'nageno apaketeno'ae'mo kanisole vaya'aife'mo, Konaga'nimogitapae, huno, Falasi vekamo mai'ne'na Falasi vaya'ai mafa'nemo mai'nove. Nagaemo agava ne'maiya vekae'mo nagesa afi'na fatago huge fali'naya vaya'mo he tigae, hu'na nagesa afi'na fatago huge nehu'na namogaga ai'na agava mai'nova kavatefe'mo agoti hu'a ne'natae, huno hapa pai'niye. 7 Falasi vaya'e Satiyusi vaya'mogi'e'mo ani gemo afite'apae'mo ali'a fako hute'a ge vai'nae. 8 Satiyusi vaya'mogi hu'apae'mo, fali'naya vaya'mo he otigae, hu'a huge enisole vaya'mo o'mai'nae hu'a huge apaune'apame'e vaya'mo o'mai'nae, hu'a huge hu'naya'monanafa Falasi vaya'mogimo, ha'ao, ani agufa vaya'mo mai'nae, hu'a hapa pai'nae. 9 Alopa gefati'mo hu'a mago'e mago'e hu'a ge vai'nae. Mago Falasi vaya'mo ke'aepa ge ali'a apaya ne'malaya vaya'mogimo he ti'a lokiya gefati hu'apae'mo, Ani vekamo hosu kava'amo o'age'none. Mago aunemo'a eno ha pai'nifi enisole vekamo'a eno ha pai'nifigi kanalenagi Gotife'mo kame huta o'ategetao, hu'a hapa pai'nae. 10 Lusi kava hu'a ge vai'nageno'ae'mo ati vaya'aite'mo yagaino ne'apateya hogote vekamo'a, Polo'a he'a vayu hulitata hisageno faligiye, huno agesa afiteno'ae'mo ati vaya'aife'mo, Utapa folagapati'mo avaletapa lapayate'mo alita asagaulitetapa yafa nopi'mo haitapa ateyo, huno hapa pai'niye. 11 Hani'ilagamo Ala kava ne'mo afole aiteno Polo haopale'mo he tino mai'neno'ae'mo, Polo, huno, Koli osuka lokiya vaika maiyo. Yulusalemu taonifi'mo nava gemo aeka hakalo huka hapa pai'nana kava huka Lomu taonifi'mo uka aeka hakalo huka hapa paigane, huno ha pai'niye.

Yu vaya'mogi kesi kateti'mo u'a Polo'a amagigune, hu'a vegemo hu'naya gemae

12 Ega netepi'mo mago Yu vaya'mo ali'a anupa hu'a mai'ne'a vegemo hu'nae. Ne'ya'e ani'e'mo o'neta mosita maime maime ne'utae'mo Polo'mo amagisunageno falitesigetaeke'mo halate ne'ya'mo negaune, hu'a vegemo hu'nae. 13 Kesi kateti'mo u'a vegemo hu'naya vaya'mo foti'amo ago aeno agaseno mago'e vaya'mogimo vegemo hu'nae. 14 Ani vaya'mogi mono hu'a ne'apataya vaya'aite'mo yagai'a ne'apataya vaya'aitega'e vayatama vaya'aitega'e'mo u'a, Lagaemo lokiya gemo huta ina gemo huta hune, ne'ya'mo o'neta mosita maime maime ne'uta Polo'mo amagisunageno falitesigetaeke'mo ne'ya'mo halate negaune, huta vegemo hu'none. 15 Lapakae'e kanisole vaya'e'mo Lomu vekamo yagaino ne'apateya hogote vekae'mo, lagaemo Polo'mo mago'e gemo hisigeta afigefesunanagi Polo'mo avalelika eno, hutapa ha paiyo. Avaleli'a ne'esagetae'mo kate'mo kafo yagai'neta kamiti amagigune, hu'a hapa pai'nae.

16 Ani gemo hu'a vegemo hu'naya'monanafa Polo asa'amo mafa'nemo'a vegemo hu'naya gemo afiteno uno yafa nopi'mo haino Polofe'mo ha pai'niye. 17 Polo'a ani gemo afiteno'ae'mo mago ati vaya'aite'mo yagaino ne'apateya vekae'mo, Ani neya vekamo'a mago gemo hu'nigi yagaino ne'apateya hogote vekalegamo eka avalelika uvo, huno ha pai'nigeno 18 ati vaya'aite'mo yagaino ne'apateya vekamo'a avalelinuno yagaino ne'apateya hogote vekae'mo, Kalavusi huta ate'nona vekamo Polo'a ge hu'nige'na e'nogeno mago gemo naha pai'niye. Naha paino'ae'mo, Ani neya vekamo'a mago gemo hu'nigi yagaino ne'apateya hogote vekalegamo eka avalelika uvo, huno naha pai'niye. 19 Yagaino ne'apateya hogote vekamo'a ayate alininuno, Na agufa gemo naha paigane, huno afi ge'nigeno'ae'mo, 20 Yu vaya'mogimo kagaefe'mo hu'apae'mo, Polo'a kanisole vaya'aitegamo avalelika egetao mago'e gemo hisigeta afigesune, hu'a hisayana aigofe gemo hugae. 21 Ani gemo kaha paisagekae'mo o'afiyo. Foti'amo ago aeno agaseno mago'e vaya'mo kate'mo fala ki'a kafo yagai'a maigae. Apakaemo hu'apae'mo, Ne'ya'mo o'neta mosita maime maime ne'uta Polo'mo amagisunageno falitesigetaeke'mo halate ne'ya'mo negaune. Alagi lama gemo nehune, hu'a apago'ya atale'nae. Ago alo hu'a kagaefeke'mo kagava mai'nae, huno ha pai'niye. 22 Yagaino ne'apateya hogote vekamo'a, Naha pai'nana gemo mago vekae'mo ha opaiyo, huno ha paiteno neya vekamo alino atalegeno u'niye.

Polo'a ali'a ate'nageno mago vekamo yagaino ne'apateya vekamo agi'amo Filikisitegamo u'niya gemae

23 Ati vaya'aite'mo yagaino ne'apateya hogote vekamo'a ati vaya'aite'mo yagai'ana ne'apata'a vekalafe'mo, Tu hataleti'a ati vayanagi seveti'a hosile'mo alinitata nehaya vayanagi tu hataleti'a hayomo ali'naya vayanagi hutana Sisaliya taonifi'mo kitamo nekuna afina'mo visayafe'mo alo hi'ao. 24 Mago hosifi'mo Polo'mo avaleli'a visaya hosimo alo hi'ao. Polote'mo alagepa hutana yagaitana ate'netana muki vaya'aite'mo yagaino ne'apateya gamani vekamo agi'amo Filikisitegamo avalelitana vi'ao, huno hana pai'niye. 25 Huno hana paiteno'ae'mo mago avo'mo kae'niye. Ani avo'mo kaeno'ae'mo,

26 Nagaemo Kilotiyasi Lisiyasi'namo muki vaya'aite'mo yagaika ne'apatana vekamo hogote vekamo Filikisigae'mo avo'mo kae'nae'mo alagepa huka mai'napiye. 27 Yu vaya'mogimo ani vekamo amagi'a fali'a atesayafe'mo amagi'nae. Lomu vaya'mogi yagai'a ne'ataya vekamo mai'niye, hu'na afi'nova'mofe'mo amagi'nagetae'mo nagae'e ati vaya'ni'e'mo apayapati'mo agufamo alita katita ate'none. 28 Na kava hu'niye, hu'na apafi gesuvafe'mo kanisole vaya'aitegamo avaleli'na lami'nove. 29 Amagisageno falisiya kava'mo huge kalavusi huta atesuna kava'mo huge osu'niya'monanafa Yu vaya'mogi ke'aepa ge'apileti'mo agoti hu'a atesayafe'mo nehae. 30 Mago Yu vaya'mogi vegemo hu'apae'mo, amagigune, hu'a hu'naya gemo afi'nova'mofe'mo kagaetegamo ali'na atesugeno ugiye, hu'na nagesa afi'nove. Agoti hu'a atesayafe'mo hu'naya vaya'aife'mo, Filikisitegamo utapa ina hosu kava'mo hu'niye, hutapa ha paiyo, hu'na hapa pai'nove,
huno avo'mo kae'niye. 31 Ati vaya'mogimo hapa pai'niya gemo akame hu'nae. Apakaemo hani'ilagamo Polo'a avaleli'u'a Atipatilisi taonifati'mo atale'nae. 32 Ega'amo mopafi'mo umenitata nehaya ati vaya'mo yafa notegamo atagi ne'a e'nage'apae'mo hosile'mo alinitata nehaya vaya'mogimo avaleli'a u'nae. 33 Sisaliya taonifi'mo avaleli'u'a yagaino ne'apateya vekamo ayapi'mo Polo'mo atete'a avo'mo ami'nae. 34 Ani vekamo vaya'aite'mo yagaino ne'apateya vekamo'a avo'mo alino lekana paino afiteno'ae'mo Polofe'mo, Haiya kotega vekae, huno afi ge'nigeno'ae'mo, Silisiya kotega vekamo mai'nove, huno ha pai'niye. 35 Ha pai'nigeno'ae'mo, agoti hu'a katesayafe'mo nehaya vaya'mo e'a ava'yi hisage'nae'mo gekamo afiguve. Heloti'a ki male'niya no'mo alopa nopi'mo yagaitapa ateyo, huno hapa pai'niye.